Regione Sardegna
Sa sotziedadi Umanitària - Tzineteca Sarda, s’assòtziu Babel e Areavisuale faint a sciri ca est bessia on line sa de 7 editzionis de su bandu nou po su cuncursu tzinematogràficu internatzionali destinau sceti a is produtzionis in is lìnguas de minoria.
Est mannu e profetosu s’impìnniu culturali de is tres diretoris artìsticus
de su Babel film festival Antonello Zanda, Tore Cubeddu e Paolo Carboni, unu traballu chi ddis at giau soddisfatzioni manna e chi ddis at fatu arretziri arreconnoscimentus a livellu natzionali e internatzionali in is editzionis de is annus passaus: de sa Presidèntzia de s’Unioni Europea e de s’ UNESCO, de sa Presidèntzia de su Consillu de is ministrus, de sa Camera e de su Senau, de su Consillu de Europa, de s’ANCI e de s’Elen (European Language Equality Network).
Ocannu puru si pensat ca sa partetzipatzioni at a essi manna meda. In is annus is nùmerus de is chi ddoi ant pigau parti sunt andaus sèmpiri ammanniendi, in s’ùrtima editzioni is film iscritus fiant 113 e intra de custus sa cummissioni nd’ at sceberau 71 chi rapresentaiant 33 lìnguas de minoria.
Su Festival est partziu in duas setzionis printzipalis: sa setzioni ufitziali e is àteras. Intrant in sa setzioni ufitziali totu is film innui si fueddat una lìngua de minoria. Is film ant a essi giudicaus de sa Giuria Babel chi at a premiai su mellus longumetràgiu (documentàriu o fiction de prus de 45 minutus) e su mellus documentàriu curtzu (chi non propassit is 45 minutus). Is prèmius prevìdius sunt medas e non in dinari sceti.
In su Programma de su festiival 2021 ddoi est finsas s’òpera chi at bintu su cuncursu Kentzeboghes po progetus tzinematogràficus in is lìnguas e dialetus sardus, promòvia de s’assòtziu culturali Babel, a manus de pari cun sa sotziedadi umanitària- Tzineteca sarda de Casteddu, Ejatv, Areavisuale Film e Associazione Boxis.
Po si nci iscriri a su festival ddoi at tempus finsas a su 30 de làmpadas de su 2021.
Su regulamentu nou e su mòdulu de iscritzioni fait a ndi ddus scarrigai de su giassu internet de su festival : http://www.babelfilmfestival.com/ innui s’agatant totu is informus de is editzionis bècias puru. (a.f.)