Regione Sardegna
Ant a inghitzai de innoi a pagu tempus, fortzis a metadi de custu mesi, is traballus po assentai sa strada provintziali n.33 chi andat de Àllai a Samugheo, serrada in parti po dda ponni in seguresa a pustis de s’arruta de perdas in su caminu.
Is traballus ant a depi assegurai sa possibilidadi de torrai a impreai totu sa strada, chi imoi est abeta sceti in una corsia cun su passàgiu regulau de unu semàfuru.
De sa Provìntzia de Aristanis ant fatu a sciri ca, a pustis de su tempus chi ddoi bolit po agatai totu su materiali e progetai s’interbentu, ant a inghitzai is traballus.
Su problema mannu pertocat sa parti de a intru de sa bia, innui aiant agatau una irregolaridadi in unu canali.
Tènnicus e oberajus, impari cun espertus de arrocas, aiant fatu unu primu cuntrollu me in sa provìntziali su 19 de gennàrgiu de ocannu, a pustis de s’arruta de furundulla de perdas de su costoni de sa strada, chi nd’aiat fatu assicai meda a is amministadoris comunalis de Samugheo.
Is espertus, in dònnia manera, aiant nau ca no ddoi fiat su tanti de serrai totu sa strada, finsas po no lassai sa bidda de su Mandrolisai isulada, ca finsas sa strada Samugheo-Busache est serrada de tempus meda. (s.m.)