Regione Sardegna
Sunt agiumai unus 1.400 personas, partzidas intra de is comunus de Simaghis, Àllai e Samugheo, chi de custu mesi sunt abarradas sena de su dotori de famìllia. Difatis, a pustis de coranta annus de traballu, est friscu friscu de pensionamentu su Dotori Antonio Sanna chi giadiat su servìtziu in custas tres biddas. De innoi a duus mesis at a lassai unus 1.2000 assìstius finsas un’àteru dotori, Salvatore Carta, chi a dii de oi tenit s’ambulatòriu in cincu biddas diversas: Samugheo, Àllai, Simaghis, Ollasta e Biddobrana.
In totu, duncas, sunt agiumai 2.600 is personas chi tenint abisòngiu luegus o, cumenti si siat, in pagu tempus de unu dotori de famìllia nou.
Is sìndigus de is comunus interessaus ant fueddau de custu problema cun su commissàriu de sa Assl Antonio Francesco Cossu, in un’àtobiu cun is amministradoris de su Distretu de Aristanis chi ant fatu cida passada. Ma de is ofìtzius de bia Carducci no est arribada arrespusta peruna. In s’interis de is abisòngius prus de apretu si ndi sunt incurendi, po imoi, is duus collegas de Dotori Sanna abarraus in servìtziu in is tres comunus chi sighiat issu. Ma po issus no at a fai a si ndi pigai totus is assìstius cosa sua e, sena de nomìnai unu sustitutu luegus, unas centu personas megant de abarrai po tempus meda sena de assistèntzia de basi.
Sa situatzioni in provìntzia est custa: ddoi at prus o mancu unus centu dotoris de famìllia chi a dii de oi sunt in servìtziu, est a nai agiumai su 30% de mancu de cussus chi abisòngiant, custu poita is fainas po fai is nòminas noas no sunt lestras. (s.m.)