Regione Sardegna
Su diretori generali de s’assessorau po sa defensa de s’ambienti, Andreina Farris, at cunvocau po oi, sa primu dii de friàrgiu a is 10.30 de mangianu e in videucunferèntzia, su primu atòbiu de su comitau tènnicu-scientìficu, formau de espertus de arta professionalidadi e esperièntzia manna, chi at a cuncordai totu is osservatzionis de fai a sa Cnapi a intru de 60 diis de candu est bèssia in craru sa proposta de sa Carta natzionali de is àreas idòneas po is depòsitus de àliga nucleari.
Arregordaus ca de is 67 giassus apubaus in totu Itàlia, 14 sunt in Sardìnnia e unu est in s’Unioni de is Comunus de sa Baddi Bàscia de su Tirsu e Grìghini me in terrenu de Siapicia. Su sèberu de su guvernu no est stètiu tzertu beni bistu de is sardus, e prus pagu puru, ca at catzigau sa voluntadi de su 97% de su pòpulu sardu chi, 10 annus a imoi, aiat giai nau craru ca NONO a su nucleari in Sardìnnia in su referendum de su mesi de maju de su 2011.
Su comitau tènnicu-scientìficu est formau de rapresentantis de s’Arpas, agentzia regionali po s’amparu de s’ambienti de sa Sardìnnia, de s’universidadi de Tàtari e de Casteddu, de s’òrdini regionali de is geòlogus e de is duas Sovrintendèntzias archeològicas e podit domandai s’agiudu e sa consulèntzia de funtzionàrius regionalis e de àterus espertus esternus.
“Su traballu de su Comitau at a serbiri a afortiai su NONO frimu chi is sardus aiant giai nau craru.” Aici at nau su Presidenti de sa Regioni Solinas. (a.f.)