Unione dei Comuni della Bassa Valle del Tirso e del Grighine

De lunis chi benit, primu dii de friàrgiu, torrant a aberri is scolas superioris e unus setantamilla studiantis sardus ant a torrai a ponni pei me in is classis insoru. Su Presidenti de sa Regioni Solinas difatis, in s’ordinàntzia firmada s’ 8 de gennàrgiu de su 2021, aiat dispostu de transiri a su 1 de friàrgiu sa dii po torrai a scola chi aiat stabiliu su Guvernu. Ddoi est de acrarai e de cumprendi mellus ita totu s’est fatu, in s’interis chi sa scola fiat serrada, po sa seguresa de is studiantis e cantus in totu ant a podi torrai a scola. No si scit ancora si a torrai a cumentzai at a essi su 50% o su 75% de is chi frecuentant is scolas superioris sardas. Sena de àterus inditus pretzisus de sa Regioni est craru ca dònnia scola at a stabiliri in autonomia, cunforma a is disponimentus natzionalis, de fai torrai finsas a su 75% de is studiantis suus. Sa Regioni assegurat de ai megiorau is servìtzius de trasportu pùblicu, ponendi a disponimentu de s’ARST 100 postalis in prus po assegurai a totu is studentis pendolaris de biagiai segurus, arrespetendi su stesiamentu de pari a pari. (a.f.)