Regione Sardegna
Cun delìbera de sa Giunta Comunali n. 4 de su 21 de gennàrgiu de su 2021, pighendi in cunsidèriu is obietivus de s’art. 3 de su decretu lei n. 91 de su 2017 cunvèrtiu in Lei n. 123 de su 2017, su Comunu de Àllai at dispostu de pigai parti a su Progetu SIBATER. Sa punna est cussa de avalorai is terrenus non traballaus, de propiedadi comunali o privada, chi podint essi destinaus a àterus impreus de profetu e sustenìbilis. Is servìtzius de informatzioni, assistèntzia e agiudu in contu de custu progetu ddus giait s’ANCI, chi s’est finsas incurada de cuncordai su progetu, e sena de depi pagai nudda.
Custu progetu est un’aina e un’oportunidadi manna po Àllai e po totu is Comunus de is Regionis de s’Itàlia meridionali chi nci ant a pigai parti (Abrutzu, Basilicada, Calàbria, Campània, Molisi, Pùllia, Sardìnnia e Sitzìlia), poita ca giait oportunidadis noas de traballu e de rèdditu a is giòvanus, (residentis in custus giassus), chi ant a porri presentai propostas imprenditorialis po valorizai su patrimòniu pùblicu de terras e fàbricus, fai cresci is oportunidadis e s’interessu insoru a investiri in su logu innui bivint, fai cresci s’interessu turìsticu e culturali po custus logus e parai fronti a su spopulamentu me in is Comunus prus piticus. (a.f.)