Regione Sardegna
S’Assessorau regionali de su Traballu at publicau s’abisu nou in contu de su Fundu (R)ESISTO, istituiu cunforma a s’art. 14 de sa Lei Regionali n.22 de su 23 de trìulas de su 2020 po agiudai is siendas e is traballadoris chi ant tentu dannus econòmicus po mori de s’emergèntzia sanitària de sa Covid-19.
S’abisu tenit sa punna de giai amparu a custus traballadoris giadendi agiudus econòmicus a is siendas piticas, mesanas e mannas e a is traballadoris chi tenint sa partida IVA, sena de dipendentis, residentis me in Sardìnnia.
Comenti narat s’Assessora a su Traballu Alessandra Zedda, s’est arrennèsciu a fai essiri custu abisu a sportellu unu pagu in antis de su tempus, e ant aprovau finsas unas cantu mudaduras comenti cussa chi pertocat s’agiudu econòmicu parametrau a su dinai guadangiau in un’annu.
Is domandas bolint presentadas sceti a mesu de su programma postu a disponimentu de sa Regioni a intru de sa prataforma SIL (Sistema informativu de su traballu e de sa formatzioni professionali) a custu indiritzu: www.sardegnalavoro.it.
Fait a ddas presentai inghitzendi de is 10:00 de su 2 de friàrgiu e finsas a is 23:59 de su 12 de friàrgiu de su 2021, s’at a pigai in cunsidèriu sa data chi s’est mandada sa domanda a manera telemàtica e chi at a essi tzertificada de su SIL. S’assinniatzioni de s’agiudu econòmicu s’at a fai sighendi s’òrdini chi si sunt mandadas is domandas, cunforma a su tanti chi ddoi est a disponimentu.
Sa Regioni at publicau is FAQ po is chi tenint deretu a pigai parti a su bandu. Oghinou po cali si siat àteru informu e acraradura fait finsas a nci mandai una e-mail a custu indiritzu: Questo indirizzo email è protetto dagli spambots. È necessario abilitare JavaScript per vederlo.. (s.m.)
Po ndi sciri de prus craca a innoi.
Po scarrigai s’abisu craca a innoi.