Regione Sardegna
Fiat su mesi de friàrgiu de su 2020, agiumai un’annu a imoi, candu s’amministratzioni postali at detzidiu de smenguai is oras de su servìtziu in Zrofolliu. De insandus sa posta de Zrofolliu aberit dintredii e cun un adetu sceti in su sportellu chi no acudit a fai totu. Is tzitadinus arròscius de si chessai e de fai filas longas in mesu de su caminu, ant pensau de arregolli is firmas de totus po fai una petitzioni populari comenti si spetat e domandai unu servìtziu prus efitzienti.
Pinuccio Chelo, su sìndigu de Zrofolliu, chi connoscit beni sa situatzioni me in bidda sua, at cuncordau una lìtera indiritzada a su Prefetu, a sa Diretzioni Provintziali e Regionali de is postas.
In sa lìtera su sìndigu bolit fait a cumprendi cantu est de importu custu servìtziu po una bidda de milli bividoris innui no s’agatant ne Banca ne àterus servìtzius de custa genia. E domandat de ammellorai su servìtziu torrendi a aberri s’ofìtziu dònnia dii ca, a prus de s’àteru, in custu tempus de pandemia est mellus puru a non s’atrumai a pari in s’interis chi donniunu abetat su turnu suu. Sa situatzioni est peus puru po is antzianus ca issus non tenint mancu sa possibilidadi de lompit a una bidda de acanta po pagai is bulletas, tassas o po nd’arretirai sa pensioni. (a.f.)