Regione Sardegna
No eus achipiu agiumai mancu a publicai s’àteru artìculu, chi su Ministru de sa Saludi Speranza at firmau s’ordinàntzia e, imoi est ufitziali ca, de su 24 de gennàrgiu 2021, e po 15 diis, sa Regioni autònoma de Sardìnnia est zona in colori de aràngiu. No est cuntentu meda de sa detzisioni chi at pigau su Guvernu su Presidenti de sa Regioni Solinas ma, tocat a nai ca, prus pagu cuntentus meda sunt totu is sardus!
Po su Presidenti Solinas custa detzisioni est una cosa spropositada chi non podit essi.
“Custa ordinàntzia est arribada in su momentu sballiau. Pròpiu imoi chi eus inaugurau unu repartu nou de terapia intensiva in Tàtari, cun 30 postus e, àterus 14 postus ant a essi prontus, a diis, me in sa terapia intensiva de su repartu Covid de su Binaghi de Casteddu; su ministeru at pigau sa detzisioni de ponni sa Sardìnnia in zona in colori de aràngiu. Ant fatu mali is contus ca ddoi at carchi cosa chi non torrat diaberus!” Aici at nau su Presidenti Solinas e at aciuntu puru: “In de segus de is coloris ddu at genti, atividadis cummertzialis e postus de traballu, no est a pigai e a serrai totu in d-una aici.”
Sa Regioni at giai nau a su Ministru cali sunti is dudas suas e ca no est de acòrdiu mancu po nudda cun custa detzisioni e at a fai a intendi is arresonis suas me in is logus giustus.
A dònnia modu po custas 15 diis imbenientis balint totu is disponimentus e is arrègulas stabilias po is Regionis classificadas in colori de aràngiu. Arregordaus a totus ita podeus e ita non podeus fai:
- TRANSIDURAS
Fait a bessiri de is 05.00 de mangianu a is 10.00 de noti in su matessi Comunu. Si podit lompi sceti una borta a sa dii, aintru de is 5.00 de mangianu e is 10.00 de noti, in su matessi Comunu, a domu de parentis o amigus, in non prus de duas personas, e cun is fillus (si tenint prus pagu de 14 annus) o is cunviventis chi non sunt autosufitzientis.
In custas diis fait a movi de is Comunus de non prus de 5.000 bividoris po lompi sceti a cussus chi non sunt prus a tesu de 30 chilòmetrus, francu a is cabulogus de provìntzia a innui non fait a andai.
Fait a andai a àteras biddas po motivus de traballu, saludi, apretu mannu o po servìtzius chi no s’agatant me in sa pròpiu bidda. No fait a bessiri de is 10.00 de noti a is 05.00 de mangianu francu chi non siat po motivus de traballu, saludi o apretu. Donniunu podit torrai sèmpiri a su domitzìliu, residèntzia o domu cosa sua.
- TZENTRUS CUMMERTZIALIS
Is tzentrus cummertzialis abarrant serraus in is diis de festa e in cussus innantis, francu is butegas de alimentari, supermercaus, potecarias e parapotecarias, stangus, edìculas, librerias e vivàius chi sunt a intru de innia.
- SCOLAS
Didàtica in presèntzia a su 100% in is scolas de sa pipiesa, scolas elementaris e scolas mèdias. In is scolas mannas didàtica in presèntzia a su mancus po su 50% e finsas a su 75% de is studiantis.
Is universidadis ant a abarrai abertas o serradas (cunforma a cantu ant a stabili in autonomia) e a tenori de s’andamentu de s’epidemia.
- TRASPORTU PÙBLICU LOCALI
Mezus prenus a su 50% po su trasportu pùblicu locali francu is mezus chi faint servìtziu po sa scola.
- RISTORATZIONI
Non fait a papai a intru de is tzilleris e ristorantis ne in foras de inguni. De is 05.00 de mangianu a is 06.00 de merii fait a ndi pigai de is localis cosa a papai e a bufai de nci portai a domu. De is 06.00 de merii a is 10.00 de noti sceti de cussus localis cun coxina. Po cunsinniai cosa a papai in deretura a domu non ddoi at restritzionis de oràriu. Non fait a si frimai a papai o a bufai me in su caminu o in is parcus de is 6.00 de merii a is 5.00 de mangianu.
- TEMPUS LÌBERU
Sunt abertus is tzentrus sportivus. Abarrant serradas is palestras, piscinas, mostras, museus, tzìnemas e tiatrus.
- GIOGU
Sunt suspèndias is atividadis de salas de giogus, scumissas, bingo, slot machine finsas a intru de is tzilleris e de is stangus. (a.f.)