Regione Sardegna
“Sa lege est aguale pro totus” est su nòmini de su progetu presentau in su 2019 a su Dipartimentu po is afàrius regionalis e is autonomias de sa Presidèntzia de su Consillu de is Ministrus. Gràtzias a s’aprovatzioni de custu progetu e a su finantziamentu chi est arribau, de su 1 de gennàrgiu de ocannu, at fatu a aberri, me in is ofìtzius de sa Procura de Aristanis, unu sportellu de intermediatzioni linguìstica po is chi fueddant in sardu.
Su de Aristanis est su primu sportellu linguìsticu in Itàlia abertu in una Procura de sa Repùblica. Cunforma a sa Lei n.482 de su 1999 chi permitit a is utentis de impreai sa lìngua de minoria in sa relata cun s’amministratzioni pùblica, sunt giai ativus de tempus meda is sportellus linguìsticus comunalis e subra-comunalis, ma est sa primu borta chi custu servìtziu ddu giait una Procura de sa Repùblica.
Su Procuradori de Aristanis, Ezio Domenico Basso, at acrarau ca is fainas de su sportellu sunt a disponimentu siat de is tzitadinus chi domandant de ddis sighiri una protzedura de is ofìtzius giuditziàrius in lìngua sarda, siat de is magistraus e de sa politzia giuditziària chi abisòngiant de cali si siat consulèntzia in contu de lìngua sarda po su traballu insoru. In su tempus benidori – at aciuntu su Procuradori de sa Repùblica Basso- custu servìtziu s’at a podi ponni a disponimentu finsas de àteras istitutzionis de su territòriu.
Su profetu de custu progetu no est culturali sceti, giai chi ammanniat s’importàntzia de s’impreu de su sardu in dònnia setori de sa vida pùblica, ma prus ca totu po sa possibilidadi de amparu de su tzitadinu ananti de sa Lei.
Po mori de is diretivas po parai fronti a sa spraxidura de sa COVID 19 est mellus a si pigai un'apuntamentu a manera de essi arrìcius de s’operadori de su sportellu e tenni profetu de su servìtziu. Su sportellu s’agatat me in su de duus pranus de su Palàtziu de Giustìtzia me in Aristanis.
S’operadori est a disponimentu su lunis, su mercuris e sa cenàbura de is 11:30 a is 13:30 tzerriendi a su nùmeru 0783.792399 o mandendi una e-mail a s’indiritzu Questo indirizzo email è protetto dagli spambots. È necessario abilitare JavaScript per vederlo.. (s.m.)