Regione Sardegna
Su Presidenti G. Conte at firmau su DPCM nou chi balit de su 16 de gennàrgiu a su 5 de martzu de su 2021: àterus disponimentus de apretu po parai fronti e no spraxi sa pandemia de sa covid-19.
Cunforma a s’ùrtimu DPCM, firmau su 14 de gennàrgiu, e a is ùrtimus datus de s’Istitutu Superiori de sa sanidadi in contu de s’epidemia, sa Sardìnnia tenit unu ìnditzi Rt prus bàsciu de 1 e duncas, po imoi, abarrat a intru de sa zona in colori grogu impari cun sa Basilicada, sa Campània, su Molise e a sa Provìntzia autònoma de Trentu. Poneus innoi a suta una lista de is disponimentus prus de importu stabilius in su decretu nou chi dònnia tzitadinu tenit su doveri de arrespetai po su beni suu e de is àterus. A essi in sa zona in colori grogu non bolit nai a essi prus pagu atentus, ma antzis tocat a essi sèmpiri responsàbilis e a sighiri totu is arrègulas chi connosceus e eus imparau beni:
- Ponni sèmpiri sa mascheredda si seus in logu serrau e, in foras puru, candu no fait a arrespetai su stesiamentu de pari a pari de a su mancus unu metru, e in manera particulari candu si fait sa fila in logu de ofìtzius pùblicus o privaus e in is localis pùblicus;
- Sciacuai fatu fatu is manus o frigai cun d-unu gel disinfetanti;
- Fai a mancu de s’atrumai in cali si siat momentu e situatzioni;
- S’in casu unu tèngiant is sinnus de sa maladia de sa Covid-19, tocat a abarrai in domu e a tzerriai luegus a su mèigu de famìllia.
Custa est sa situatzioni finsas a oi, cenàbura su 22 de gennàrgiu de su 2021, ma parit chi siat in s’àiri s’arribu de un’ordinàntzia noa de su Ministru Speranza chi fait torrai s’ìsula nosta in zona in colori de aràngiu. Eus a biri ita totu sutzedit in is oras imbenientis. (a.f.)
Innoi asuta agatais is disponimentus de su DPCM (pigaus de aliautonomie.it) po sa zona groga.