Regione Sardegna
Su sìndigu de Zrofolliu, Pinuccio Chelo e su sìndigu de Sabarussa, Mario Tendas ant scritu una lìtera a su Prefetu de Aristanis, a su Commissàriu straordinàriu de sa Provìntzia e a sa Regioni po ddis sinnalai ca sa Strada Provintziali n.9 est totu arrogada e in cunditzionis malas diaderus. Sa Strada Provintziali n.9 est de importu mannu po is duas biddas (e non po custas sceti), poita ca de Sabarussa andat a Zrofolliu sighendi finsas a s’ingruxeri de Sant’ ‘Eru ‘e Congius cun sa S.S. 388.
Is duus sìndigus aiant giai sinnalau in su 2018 a sa Provìntzia de Aristanis sa situatzioni de abandonu de sa strada, e a pustis sa Provìntzia aiat fatu unas cantu tzapulinas de asfaltu po ammuntai is foradas prus mannas, unu traballu chi no est serbiu meda poita ca imoi sa strada est ancora peus de comenti fiat innantis.
“Sa strada est in cunditzionis malas, prena de foradas mannas e perigulosas, is chi ddoi passant sunt custretus a guidai andendi totu de una parti a s’àtera de su caminu po no nci arrui aintru, e po custu at capitau finsas calicunu intzidenti. Custa situatzioni est ponendi in pistighìngiu mannu is amministratzionis comunalis e is tzitadinus chi ndi sunt arròscius e si chèsciant, domandendi a boxi manna, e giai de tempus, chi sa Provìntzia pongiat sa strada in seguresa. Àterus traballus sunt stètius fatus in stradas prus pagu perigulosas e de prus pagu importu”- agataus scritu in sa lìtera - “Custa strada tenit abisòngiu de una manutentzioni ordinària urgenti. Domandaus chi sa Provìntzia ddoi pongiat manu luegus ca non podit essi chi a dii de oi, in una bidda tzivili, nci siant ancora stradas in custas cunditzionis”. (a.f.)