Regione Sardegna
Cun s’ordinàntzia n. 3 de su 15 de gennàrgiu de su 2021 chi tenit a ogetu: “Prescritzionis in ocasioni de sa festa de Santu Sebistianu 2021” su Sìndigu, cunforma a su decretu de lei de su 7 de santuaini de su 2020 chi at perlongau su stadu de emergèntzia finsas a su 31 de gennàrgiu de ocannu, at stabiliu ca su 19 e su 20 de gennàrgiu, est a nai in is diis chi s’afestat a Santu Sebistianu, no fait a fai unas cantus fainas acapiadas a is afestaduras po su patronu.
Pighendi finsas in cunsidèriu ca me in sa bidda de Ollasta est ammanniendi su nùmeru de is chi si nd’ant piscau su virus de sa COVID 19 e chi, duncas, tocat a fai a manera de no ddu fai spraxi de prus, su sìndigu at stabiliu ca ocannu, in ocasioni de custa festa, totu sa comunidadi at a depi arrespetai custas règulas: est proibiu a cuncordai festas e pràngius privaus, no fait a segai sa linna e a fai su foghilloni e no fait mancu a s’ammuntonai ne in monti e nimancu in is bias e pratzas de sa bidda, est proibiu a sparai guetus, a fai arrodas e a sparai a fusìlliu o àteru, tocat a abarrai a tesu de is àterus e a impreai ainas po amparai nasu e buca me in is bias e is pratzas pùblicas.
Ocannu, duncas, sa festa non s’at a fai, ma no est po mori de sa pandemia sceti. Sa bidda est in lutu a friscu e non tenit ànimu de fai festa. In custas diis su pensamentu est totu po Jèssica, sa picioca morta de pagu diis e totu in-d’una, e po sa famìllia sua, connota e stimada de totus. Dd’at nau finsas su Presidenti de sa Pro Loco de Ollasta : “Sa Pro Loco no at a cuncordai mancu sa festa religiosa, is panderas no ant a intrai a crèsia comenti dònnia annu. Sa dii de su èspuru de Santu Sebistianu s’at a fai sa missa de is otu diis a Jèssica. At a torrai su tempus po fai festa totu impari ma no est ocannu!” (s.m.)
Po ndi sciri de prus de sa festa e po connosci mellus a su Santu, podeis scarrigai s’allegau innoi asuta.