Est bessiu unu bandu regionali chi giait finsas a 7 mila èurus a dònnia famìllia chi at tentu dannus econòmicus po mori de sa pandemia. Podint presentai domanda de indennidadi una tantum is traballadoris autònomus, chi tèngiant o nono sa partida IVA, entis, agentis e scolas professionalis in su setori de su spetàculu in presèntzia, tiatru, mùsica, cultura, ballu, balit finsas a is traballadoris e tènnicus de su setori audiovisivu e tzìnema, de spetàculus de guetus, is chi aparìciant festas e tzirimònias e is chi bendint bistiris de tzirimònia puru, agentzias de biazu, palestras, bendidoris a sa minuda de is mercaeddus localis, discotecas e discopub.

S’Assessora regionali a su traballu, Alessandra Zedda, at presentau sa publicatzioni de su bandu cun custus fueddus: “Seus interbenendi cun un’agiudu econòmicu cuncretu po is traballadoris autònomus de is categorias chi, po mori de s’impositzioni de stringiduras po s’emergèntzia sanitària, imoi e totu presenti, ant tentu prus de totus dannus econòmicus de sa crisi”.

Su bandu, cunforma a sa Lei regionali n. 22 de su 23 de trìulas de su 2020, tenit sa punna de giai una manu de agiudu a su sistèma econòmicu regionali amparendi custus traballus e ponit a curri 7 millionis de èurus de su fundu regionali, pensendi de giai unus 7 milas èurus peròmini a tìtulu de indennidadi una tantum, po su tanti chi no s’est pòtziu guadangiai.

Comenti at nau su presidenti C. Solinas, sa Regioni, gràtzias a custu bandu, sighit a traballai po giai amparu a is traballadoris e a is siendas chi prus ant tentu dannus econòmicus.

Àteras arresursas chi s’ant a porri agatai, ant a essi postas in contu po agiudai a is chi sunt abarraus a foras de custu bandu ca no est bastau su dinai.

Is domandas de indennidadi telemàtica (DIT) bolint presentadas a mesu de sa prataforma regionali SIL sceti, a s’indiritzu: www.sardegnalavoro.it, inghitzendi de is 10:00 de su 21 de gennàrgiu e no a pustis de is 23:59 de su 22 de friàrgiu de su 2021. S’òrdini de arribu de is domandas est s’ùnica cosa chi giait prioridadi po arrici s’agiudu econòmicu. (s.m.)

Po ligi su bandu craca innoi.