Unione dei Comuni della Bassa Valle del Tirso e del Grighine

Su Sìndigu, cunforma a s’art. 1932 de su Decretu Legislativu n.66, de su 15 de martzu de su 2010, fait a sciri ca sunt inghitzadas is fainas po fai sa lista de leva de is giòvanus chi ant a fai 17 annus a intru de ocannu, s’at a sighiri custu calendàriu:

• in su mesi de gennàrgiu su Sìndigu s’at a incurai de iscriri in sa lista de leva is giòvanus chi tenint su domitzìliu legali in su Comunu, cunforma a s’art.1933 de su Decretu Legislativu n.66, de su 15 de martzu de su 2010;
• su 1 de friàrgiu s’at a publicai, po 15 diis in fatu de pari, sa lista de is giòvanus iscritus;
• in su mesi de friàrgiu e de martzu sa lista at a porri essi agiornada cun is iscritzionis noas o scantzelladuras, si at a tocai a ndi fai, a manera de nci dda mandai a s’òrganu militari cumpetenti a intru de su 10 de su mesi de abrili.

Totu is giòvanus interessaus chi non s’agatant iscritus me in sa lista tenint su doveri de domandai de nci essi postus; is genitoris o tutoris insorus tenint s’òbligu de castiai chi s’iscritzioni siat stètia fata a manera regulari. Po dònnia àteru informu si podit pregontai me in s’ofìtziu de sa Leva de su Comunu de Simaghis.

……………………………………………………………………………………………………………………………………………..

Art. 1933- D.Lgs n.66/2010

Domitzìliu legali. Sunt cunsideraus legalmenti domitziliaus in su Comunu:

1. Is giòvanus chi tenint su babbu o, si non tenint su babbu, sa mamma o su tutori chi sunt domitziliaus in su Comunu, mancai no ddoi siant, chi bivant in àteru logu, chi siant disterraus, emantzipaus, in presoni o fìgius de unu babbu disterrau, o de unu sordau in servìtziu o presoneri de gherra chi at tentu s’ùrtimu domitzìliu cosa sua in su Comunu;
2. Is giòvanus cojaus, chi tenint su babbu o, si non tenint su babbu, chi tenint sa mamma domitziliada in su Comunu francu chi cumprobint de tenni su domitzìliu legali in un’àteru Comunu;
3. Is giòvanus cojaus domitziliaus in su Comunu mancai su babbu, o si non tenint su babbu, sa mamma tengiat su domitzìliu in àteru logu;
4. Is giòvanus nàscius, domitziliaus e chi bivint in su Comunu chi non tenint ne babbu, ne mamma, ne tutori;
5. Is giòvanus nàscius o residentis in su Comunu chi non s’agatant in peruna de custas cunditzionis chi eus nau imoi, de sa lìtera a) a sa lìtera d), chi non giustifichint s’iscritzioni insoru in perunu Comunu.

Po s’iscritzioni in sa lista de Leva de su giòvanu nàsciu e chi bivit in èsteru est pigau in cunsidèriu su domitzìliu legali in su Comunu innui issu o sa famìllia sua ant tentu s’ùrtimu domitzìliu insoru in su territòriu de sa Repùblica; o, si non s’agatat cussu, s’at a ponni su Comunu de Roma. (a.f.)