Su 8 de gennàrgiu a merii su Presidenti de sa Regioni, Christian Solinas, at firmau s’ordinàntzia n.1 in contu de dispositzionis straordinàrias e urgèntis po parai fronti e frimai sa spraxidura de su virus de sa SARS-CoV-2 in totu su territòriu regionali sardu.

In s’ordinàntzia su Presidenti giait òrdini chi, de su 11 de gennàrgiu 2021 e finsas a su 31 de gennàrgiu 2021, in totu su territòriu regionali siant arrespetaus custus disponimentus:

1. is istitutzionis scolàsticas segundàrias de segundu gradu, statalis o paritàrias, e is istitutzionis de istrutzioni o formatzioni professionali, ant a cuncordai s’atividadi didàtica insoru in manera prus flessìbili, cunforma a is artìculus 4 e 5 de su decretu de su Presidenti de sa Repùblica n. 275, de su 8 de martzu de su 1999, po fai a manera chi su 100% de is atividadis si fetzant sighendi sa didàtica digitali integrada e cantu giai stabiliu de s’autonomia scolàstica a pustis de su DPCM de su 3 de donniassanti de su 2020;
2. abarrat sèmpiri assegurada sa possibilidadi de fai is letzionis in presèntzia, po is fainas de laboratòriu chi non fait a fai de domu o candu tocat a assegurai una relata profetosa de educatzioni po s’inclusioni scolàstica de is alunnus disàbilis, o de is alunnus chi tenint abbisòngius educativus spetzialis (BES), a tenori de su chi previdit su decretu de su Ministru de s’istrutzioni n. 89, de su 7 de austu de su 2020, e s’ordinàntzia de su Ministru de s’istrutzioni n. 134, de su 9 de santuaini de su 2020. Abarrat assegurau su cullegamentu in lìnia cun is alunnus de sa classi chi faint sa didàtica digitali integrada.

Cunforma a su chi s’est nau, su servìtziu de trasportu pùblicu locali, finsas a su 31 de gennàrgiu de su 2021, abarrat organizau comenti est imoi etotu. A pustis chi is istitutzionis scolàsticas segundàrias de segundu gradu, statalis o paritàrias, e is istitutzionis chi giaint istrutzioni o formatzioni professionali ant a torrai a cumentzai sa didàtica in presèntzia, s’at a mellorai e ammanniai s’oferta de su trasportu pùblicu locali aciungendi àterus servìtzius, a tenori de su chi serbit e de su chi previdint is documentus operativus de is Prefeturas in s’artìculu 1, comma 10, lìtera s), de su DPCM de su 3 de nadali de su 2020.

Po totu su chi no est stabilèssiu in cust’ùrtima ordinàntzia, balit cantu giai dispostu in su DPCM de su 3 de nadali de su 2020 e in is allegaus cosa sua. Custa ordinàntzia agatat aplicu de su 11 de gennàrgiu 2021 e finsas a su 31 de gennàrgiu, francu perlongamentu, o àterus disponimentus diferentis chi ant a porri bessiri a nou cunforma a comenti mudat sa spraxidura de su virus chi at a essi sèmpiri cuntrollada de is òrganus de s’amministratzioni e de is aziendas cumpetentis. (a.f.)

Craca innoi po ligi s’Ordinàntzia n. 1/2021 de su Presidenti de sa Regioni