Regione Sardegna
Su 27 de nadali de su 2020 at a essi “una dii de s’arregordai, una dii cun unu valori simbòlicu mannu, ca est stètiu fatu su primu passixeddu po torrai a sa normalidadi”. At nau aici su Presidenti de sa Regioni, Christian Solinas, chistionendi de is primus vacinatzionis contra de sa Covid fatas in Sardìnnia po cussa chi ant nomenau “Vaccine Day”: sa dii de su vacinu.
Sa dii de Paschixedda me in totu su territòriu natzionali sunt arribadas is primus dosis de sa meighina Pfizer-BioNTech, su vacinu contra a sa Covid-19.
In Sardìnnia sunt arribadas 180 dosis de vacinu chi in su giru de cuatru diis ant a serbiri a vacinai su pròpiu nùmeru de operadoris sanitàrius de s’ARNAS “G.Brotzu”, de s’ispidali Santissima Trinità de Casteddu e de su Policlìnicu universitàriu “D.Casula” de Pauli. Is fialas de su vacinu sunt arribadas a merì su 26 de nadali a s’aeroportu de Su Masu e mandadas in deretura a s’ispidali “Brotzu”, su tzentru chi sa Regioni at sceberau po fai is primus vacinus programmaus. Silverio Piro, mèigu infetivòlogu de 71 annus e Virginia Boi, un’infermiera de 58 annus, sunt is primus duus vacinaus in Sardìnnia. Prexu e emotzioni manna po custas duas primus vacinatzionis. “Unu sinnali importanti meda - at nau s’assessori regionali a sa sanidadi Nieddu- in su mesi de gennàrgiu ant a arribai àteras 33 mila dosis e a pustis nd’at a arribai sa pròpiu cantidadi destinada a is categorias prus a arriscu cunforma a is critèrius stabilius a livellu natzionali. In antis ant a cumentzai a vacinai is operadoris sanitàrius e sòtziu-sanitàrius, su personali e is chi bivint in is RSA. In is diis chi sighint aspetamus àteras 4.000 dosis e eus a vacinai totu is chi traballant me in is struturas sanitàrias pùblicas e in cussas privadas”. Is Tzentrus de vacinatzioni chi at sceberau sa Regioni sunt 12, spraxus me in totu su territòriu regionali e s’agatant a canta, o a pagu tretu, de is ispidalis sardus prus mannus. Sa campagna de vacinatzioni at a sighiri prus o mancu po un’annu, cun sa spera chi su tempus potzat essi prus pagu puru si, in s’interis, ndi essint a pillu àterus vacinus. S’assessori fait a sciri ca sa Regioni est sèmpiri in cuntatu cun su Guvernu e ca est traballendi giai de unas cantu cidas po aprontai totu su chi serbit po chi su sistema sanitàriu regionali siat prontu a sa campagna de vacinatzioni de is mesis chi ant a sighiri. Po imoi tocat a tenni ancora passièntzia, sensu de responsabilidadi e a non si scaresci ca su virus est girendi; tocat a sighiri totu is arrègulas chi scideus beni po non si dd’apitzigai pari pari: stesiamentu personali, ponni sa mascheredda e sciacuai fatu fatu is manus. (a.f.)