Regione Sardegna
Po mori de su sighiri de custa pesta de Covid-19 sa de ocannu at a essi, po cosas meda, una Paschixedda unu pagu diferenti po totus. Su dìciu narat “pagu genti, bona festa” e insandus speraus chi siat aici! Bideus ita podeus e ita non podeus fai cunforma a is ùrtimas dispositzionis de su D.L. n.172 de su 18 de nadali de su 2020.
In is diis de festa e in is diis in antis, in totu su territòriu natzionali, balint is dispositzionis de su DPCM de su 3 de nadali de su 2020 stabilias po is zonas arrùbias.
Ita podeus e ita non podeus fai su 24, 25, 26, 27, 31 de nadali e su 1, 2, 3, 5, 6 de gennàrgiu
- Fait a bessiri po traballu, saludi e apretu sceti. Movendi de is Comunus de non prus de 5.000 bividoris fait a lompi sceti a cussus chi non sunt prus a tesu de 30 chilòmetrus, francu a is cabulogus de provìntzia a innui non fait a andai.
- Cumentzendi de su 24 de nadali e finsas a su 6 de gennàrgiu de su 2021 fait a bessiri de domu una borta sceti e in non prus de duas personas po andai a una domu privada de sa pròpiu regioni. Paris a custas duas personas podint bessiri sceti is fillus chi no ant lòmpiu is 14 annus e is disàbilis chi bivint cun issus.
- Non fait a andai de una regioni a s’àtera ne a lompi a is de duas domus.
- Serranti is tzilleris e is ristorantis. Finsas a is 22.00 fait a nd’ arretirai cosa de papai de si nci portai a domu. Po dd’arriciri in deretura in domu invècias non ddu at restritzionis.
- Serrant is butegas e is tzentrus estèticus.
- In mesu de is àterus abarrant abertus: edìculas, stangus, potecarias e parapotecarias, atividadis chi giaint servìtzius a sa persona: lavasecus, maistus de pilus e braberis.
- Fait a fai atividadi fìsica a canta de domu e atividadi sportiva me in logus apertus e a sa sola sceti.
- Non fait a bessiri de is 22.00 a is 5 de mangianu, francu chi non siat po motivus de traballu, saludi o apretu.
Su 28, 29, 30 de nadali e su 4 de gennàrgiu in totu su territòriu natzionali balint is dispositzionis stabilias de su DPCM de su 3 de nadali de su 2020 po is zonas in colori de aràngiu.
Ita podeus e ita non podeus fai in custas diis
- Non fait a bessiri de is 22.00 a is 5 de mangianu francu chi non siat po motivus de traballu, saludi o apretu.
- Fait a bessiri po motivus de traballu, saludi o apretu. In custas diis fait a movi de is Comunus de non prus de 5.000 bividoris po lompi sceti a cussus chi non sunt prus a tesu de 30 chilòmetrus francu a is cabulogus de provìntzia a innui non fait a andai.
- Serrant is tzilleris e is ristorantis. Finsas a is 22.00 fait a nd’ arretirai cosa de papai de si nci portai a domu. Po dd’arriciri in deretura in domu invècias non ddu at restritzionis.
- Is butegas podint abarrai abertas finsas a is 21.00.
S’arrecumandat a totus de no arriciri genti stràngia me in domu e de fai a mancu de fai cenas e pràngius cun trumas de amigus o parentis. (a.f.)
Decretu-Lei de su 18 de nadali de su 2020, n.172
Mòdulu de autotzertificatzioni po si movi de su 24 de nadali