Regione Sardegna
In unus 160 comunus sardus su 25 e su 26 de santuaini is tzitadinus ant torrau a sceberai a is sìndigus insoru. Intra de is comunus sardus prus mannus ddui fiat Nùgoro, Cuartu e Portu Turre. In provìntzia de Aristanis is comunus innui ant torrau a votai fiant 41 in totu: Mòguru, Santa Justa, Samugheo, Arborea e Ilartzi, arremonendi is comunus prus mannus. Is àterus comunus fiant Abbasanta, Àllai, Assolo, Asuni, Baressa, Bidoniu, Busache, Crucuris, Frussio, Fordongianus, Gonnonò, Gonnostramatza, Làconi, Masuddas, Montresta, Neoneli, Norghiddo, Nurachi, Prammas, Pau, Paulle, Arcidanu, Santeru, Santu Lussùrgiu, Sèneghe, Sinnariolo, Siamaiore, Siapicia, Simaghis, Sune, Tadasune, Ula, Useddus, Sant'Antoni, Biddanoa Truschedu e Zeddiani. Cuatru de custus comunus faint parti de s’ Unioni de sa Baddi Bàscia de su Tirsu. Bideus e chini sunt is sìndigus nous in s’Unioni.
In Àllai is tzitadinus ant torrau a votai a su sìndigu bèciu, Antoni Pili, de sa lista “Ancora insieme per Àllai”.
In Simaghis, de is tres listas presentadas, “Imparis Pro Simaxis, San Vero Congius” cun Carlo Salaris candidau a sìndigu, "Progetto e Rinascita per Simaxis” cun Giampiero Cabras candidau a sìndigu e “Uniti” cun candidau su sìndigu bèciu Giacomo Obinu, at bintu sa lista n.3 “Uniti”. Is tzitadinus ant torrau a sceberai a Giacomo Obinu, chi at amministrau sa bidda in custus 5 annus passaus puru.
In Siapicia at bintu sa lista n.1 “Unius pro Siapiccia”, cun sa cunfirma de su sìndigu bèciu, Raimondo Deidda.
In Biddanoa Truschedu, invècias, su sìndigu est una fèmina: Margherita Camedda, chi at ghiau sa lista tzìvica presentada a is eletzionis.
A totu is sìndigus e is amministradoris comunalis nous is augùrius prus bellus po unu traballu profetosu. (a.f.)