Regione Sardegna
Su Consillu de is Ministrus, in sa setziada de su 7 de su mesi de ladàmini, at perlongau su stadu de emergèntzia acapiau a sa COVID-19 finsas a su 31 de gennàrgiu de su 2021. Comenti si contant is crònacas de custas diis, su virus Sars-CoV-2 megat de si spraxi in biddas meda de sa provìntzia de Aristanis puru. Sa cosa ponit pistighìngiu mannu e est po cussu chi sa Giunta comunali de Siamanna at giau inditus a su responsàbili de is Servìtzius amministrativus de su Comunu po cuncordai is test sierològicus in favori de sa populatzioni siamannesa.
S’averiguadura, chi dd’at a fai unu laboratòriu de anàlisi spetzializau e autorizau, no est de òbrigu e s’at a podi fai gratis (su costu ddu pagat su Comunu). At a podi presentai domanda una personi sceti po dònnia famìllia.
“Custu test - narat su sìndigu de Siamanna, Franco Vellio Melas - est un’aina de importu po biri cantu sa maladia s’est isprata in d-una comunidadi, si una personi nd’at piscau su virus in is mesis passaus (mancai non ddi siat bessiu sinnalli perunu) o si s’infetzioni est in cursu, mancai su sugetu interessau non presentit sinnali perunu o presentit una sintomatologia lèbia e de pagu contu”. Su de connosci sa mannària de sa spraxidura de su virus in bidda podit agiudai a is siamannesus a parai fronti mellus a custu inimigu mudu, perigulosu e de trassas malas. (a.i.g.)