Unione dei Comuni della Bassa Valle del Tirso e del Grighine

Torrau a aberri su sportellu linguìsticu

Gràtzias a unus cantu finantziamentus statalis e regionalis po is annus 2016, 2017 e 2019, in s’Unioni de is Comunus de sa Baddi Bàscia de su Tirsu e de su Grìghini at torrau a aberri su sportellu linguìsticu ùnicu po àrea. Su servìtziu est a disponimentu de is comunidadis de Àllai, Biddanoa Truschedu, Ollasta, Siamanna, Siapicia, Simaghis e Zrofolliu.

Acasagiau po immoi in sa sea de s’Unioni (in Sant’’Eru de Còngius, in bia de Santu Nigola), su sportellu aberit dònnia dii a mangianu, de is 9.00 a is 14.00. Est a disponimentu de tzitadinus, studiantis, maistus de scola, assòtzius culturalis, etc., po cali si siat informu, aprofundamentu, duda, curiosidadi chi pertocat sa lìngua sarda e s’impreu suu in is raportus cun s’Amministratzioni Pùblica, po consulèntzias bibliogràficas, sitogràficas e ortogràficas in contu de su sardu, po consulèntzias in sa carrera didàtica e in cussa giurìdicu-normativa.

Po intrai a s’ofìtziu s’arrecumandat de arrespetai is cumportamentus de seguresa po firmai sa spraxidura de su Sars-CoV-2: tocat a si ponni sa mascheredda, a si frigai is manus cun su gel disinfetanti chi s’agatat in s’intrada, a intrai a unu a unu e a abarrai a tretu de unu metru de sa personi chi seus chistionendi. Ma s’operadori de sportellu si podit circai finsas telefonendi a su nùmeru 0783.405448 o mandendi una e-mail a s’indiritzu Questo indirizzo email è protetto dagli spambots. È necessario abilitare JavaScript per vederlo.. (a.i.g.)