Regione Sardegna
Su 29 de martzu in Aristanis at a cumentzai sa de duus editzionis de s'OPP DAY, sa Fiera de su traballu e de s'auto-imprendidorialidadi. At a essi un'ocasioni de importu mannu po favoressi s'atòbiu intra chini est circhendi traballu e chini giait traballu e agiudai is impresas a agatai e a seletzionai personali motivau.
De is noi oras de mangianu a is ses de merii in sa sea de sa Confcummèrtziu de Aristanis, in bia de Sebastianu Mele, 7g s'ant a atobiai a pari siendas e traballadoris
Sunt prus de 60 is postus de traballu a disponimentu in su setori de su cummèrtziu, de su turismu e de is servìtzius. Chini est circhendi traballu si podit candidai finsas a su 27 de martzu.
Is siendas chi invècias bolint pigai parti a s’Opp Day po agatai traballadoris nous depint presentai sa proposta issoru a intru de su 22 de martzu.
Po ddoi pigai parti tocat a si nci scriri in su giassu https://www.confcommerciodioristano.it/opp-day-fiera-del-lavoro e a sighi is inditus in ''sono un'azienda'' o puru '' chirco traballu''. A pustis de si nci essi allistraus s'at a fueddai cun sa segreteria de s'OPP DAY chi at a circai de favoressi is atòbius intra is chi chircant e is chi giant traballu.
Est de seguru un'ocasioni chi non bolit pèrdia po is aristanesus e po is tzitadinus de is biddas de a canta po agatai unu postu de traballu cunformas a is chi sunt is cumpetèntzias issoru. Sa Confcummèrtziu de Aristanis invitat a totu is interessaus a nci pigai parti.
Po totu is àterus informus fait a intrai a su giassu https://www.confcommerciodioristano.it/opp-day-fiera-del-lavoro, a tzerriai a s’Assòtziu Confcummèrtziu Aristanis a su nùmeru 0783-73287 o a mandai una mail a s’indiritzu de posta eletrònica Questo indirizzo email è protetto dagli spambots. È necessario abilitare JavaScript per vederlo.