Regione Sardegna
Su Comunu de Simaghis e sa sotziedadi Hera Luce ant firmau su cuntratu po fai a nou e po sa gestioni de s’illuminatzioni pùblica: su progetu previdit de cambiai 560 lampionis de sa luxi bècius cun luxis noas a led chi ant a fai sparanniai finsas a su 72% de su consumu energèticu.
S’amministratzioni comunali at firmau custas diis passadas su cuntratu cun Hera Luce, una sotziedadi de su Grupu Hera intra de is prus mannus operadoris natzionalis de su setori de s’illuminatzioni pùblica, su cuntratu previdit de sparanniai energia e finsas de ponni a norma e in seguresa is impiantus de illuminatzioni pùblica po assegurai non sceti de melliorai sa calidadi de sa luxi ma de arrespetai s’ambienti puru ca minimat s’incuinamentu.
A prus de ponni manu a s’illuminatzioni pùblica ant a essi cambiaus 72 palus bècius de sa luxi, ant a torrai a fai 6 cuadrus elètricus e 6 sistemas de telecontrollo cun su computer.
Sa luxis a led chi ant a essi postas sunt de ùrtima generatzioni e ant a avalorai finsas giassus meda de sa bidda a prus de fai una luxi prus bella puru. Sa sotziedadi Hera Luce difatis tenit un’esperièntzia manna in contu de custa tecnologia e nci arrennescit a sceberai su mellus de is propostas de su mercau ponendi in contu is Critèrius ambientalis mìnimus po s’illuminatzioni pùblica cunformas a is inditus de sa polìtica europea chi ponit paris cumpetitividadi e sustenibilidadi po agiudai a lompi a is obietivus de svilupu sustenìbili fissaus de s’Agenda ONU 2030 e sighendi sa polìtica de su chi in inglesu si narat carbon neutrality.
Comenti cuntatai sa sotziedadi Hera Luce:
Po sinnalai guastus a is impiantus de s’illuminatzioni pùblica o semàforus gestius de Hera Luce, est a disponimentu su nùmeru birdi nou 800.498.616 chi fait a tzerriai gratis de su telefonu fissu o de su telefoneddu ativu totu s’annu, 24 oras dònnia dii e 7 diis a sa cida
Po ndi sciri de prus fait a ligi s’avisu chi s’agatat publicau in su giassu istitutzionali de su Comunu de Simaghis o a intrai a su giassu https://www.heraluce.it/