Regione Sardegna
Est in programma in Àllai martis 20 de nadali a is 18.00, in sa crèsia de su Spìridu Santu, su cuntzertu de mùsica gospel cun Claudia Marss e is Gospel Italian Singers (8 coristas e 3 musicistas) diretus de su maistu Francesco Finizio chi cun The Christams Tour Gospel Sardegna at a lompi a biddas meda de s’ìsula nosta.
Claudia Marss est cunsiderada una de is mellus interpretis de su Gospel. Nàscia in Salvador de Bahia in Brasile, est cantanti e composidora. Ponit paris is ritmus de sa mùsica populari brasiliana cun cussus afru-americanus. In su curriculum cosa sua nci tenit prèmius meda, at traballau finsas cun su musicista brasilianu famadu Gilberto Gil, at pigau parti a programmas meda de sa Rai. In su film de Carlo Verdone “Maledetto il giorno che t’ho incontrato” sa cantanti brasiliana cantat unu de is temas de sa culunna sonora. In su 2004 Nicola Piovani dd’aiat sceberada comenti de solista po cantai su “Stabat Mater- La Pietà” (mùsica de Piovani e testus de Vincenzo Cerami) a costaus de Gigi Proietti e Rita Cammarano.