Regione Sardegna
A pustis de duus annus chi non s’est pòtzia fai po nexi de sa Covid, sàbudu 26 e domìnigu 27 de donniassantu sa Pro Loco de Simaghis cuncordat sa de 28 editzionis de sa sagra de s’arrosu.
Cuncordada po sa primu borta in su 1987 de sa Pro Loco sa sagra, fiat a printzìpiu, sa dii de s’arrosu e est crèscia in is annus finsas a diventai un apuntamentu fissu a innui acudit genti meda de sa Provìntzia e de dònnia giassu po tastai s’arrosu e is produtus tìpicus de su territòriu.
Nàscia cun sa punna de fai a connosci su chi est unu de is mellus produtus localis e de ndi fai apretziai sa calidadi est s’ùnica manifestatzioni de custa genia in totu sa Sardìnnia, finsas ca su prus de sa produtzioni de arrosu est pròpiu in provìntzia de Aristanis.
In custas diis si cuncordant cunvènnius a tema, atòbius cun is assòtzius de categoria, mustras e spetàculus musicalis e totu is chi acudint, de logus de acanta e de allargu, podint papai arrosu de calidadi cotu e cundiu in tantu maneras e connosci is bellesas de sa bidda e de su territòriu a giru.
Ocannu sa sagra s’at a fai in sa pratza de su campu sportivu comunali, su programma est custu:
Sàbudu 26 de donniassantu
Cumentzendi de is ses de merii at a fai a tastai diferentis calidadis de arrosu cotu e cundiu in tantas maneras, a si firmai a castiai o a comporai is produtus localis e a biri una mustra cuncordada in su Tzentru sotziali. No ant a amancai spetàculus musicalis in cumpangia de Soleandro e Luca Rocca e de Gian Silvio Pinna.
Domìnigu 27 de donniassantu
De ora de is dexi de mangianu at a fai a castiai e a comporai is produtus de sa mustra mercau, a lompi a sa mustra de su Tzentru Sotziali, a fai bisitas ghiadas a is monumentus prus de importu de sa bidda e, a ora de prandi, a tastai s’arrosu. A merii Elena Ciccu, animadora e cantanti, at a tratenni e a spassiai mannus e pipieddus cun mùsica e giogus.
Po informus fait a intrai a sa pàgina FB de sa Pro Loco de Simaghis.