Regione Sardegna
Est in programma sàbadu 17 e domìnigu 18 de cabudanni de su 2022 su de duus coas de cida de sa primu editzioni de sa manifestatzioni “Is diis de su Romànicu in Sardìnnia”. Sa manifestatzioni est cuncordada e coordinada de sa Fondazione Sardegna Isola del Romanico, e bolit fait a connosci is crèsias e santuàrius de s’ìsula nosta e sa stòria issoru.
De is crèsias chi ant a abarrai abertas custu coa de cida in Provìntzia de Aristanis duas sunt in s’Unioni de sa Baddi Bàscia de su Tirsu e de su Grìghini: sa crèsia de Santu Marcu in Ollasta e sa crèsia de Santu Juanni in Zrofolliu. Ambaduus Comunus sunt intraus in parti in su progetu “Sardegna isola del romanico” po avalorai e fai a connosci is crèsias romànicas issoru chi faint parti de su patrimòniu architetònicu e culturali locali e de totu sa Sardìnnia.
Sa bidda de Ollasta est aprontendi.sì a arriciri mellus chi fait a totu is stràngius chi ant a lompi. Sàbadu 17 de cabudanni in Ollasta at a fai aintrai a biri a sa crèsia e a sa cripta de Santu Marcu cun sa spiegatzioni de is guidas chi ant a essi a disponimentu de is 09.30 a is 13.30 e de is 15.30 a is 18.30.
Chini at a arribai a Ollasta at a gosai de is àteras bellesas de sa bidda e de sa calidadi de is produtus tìpicus localis. A ora de is cincu de merii is Tenoris de Neoneli ant a allirgai sa dii cun is cantus issoru.
In Zrofolliu puru domìnigu 18 de cabudanni at a essi aberta sa cresiedda de Santu Juanni de is 09.00 a is 13.00 e de is 15.00 a is 19.00 e totu sa bidda si bestit a festa e si preparat a amostai a is stràngius su mellus chi tenit.
Po totu is àterus informus e po ligi totu su programma cumpletu de sa manifestatzioni cun is biddas, is crèsias e is oràrius de bisita fait a intrai a su giassu https://www.romanicosardegna.org/comunicazione/notizie/notizia/Al-via-la-prima-edizione-delle-Giornate-del-Romanico-in-Sardegna/