Regione Sardegna
In ocasioni de is eletzionis polìticas de su 25 de cabudanni de su 2022, is eletoris italianus chi in s’interis s'agatant in èsteru (po motivus de traballu, de stùdiu o de saludi e is familiaris chi bivint cun issus, su personali de is Fortzas armadas e de politzia impinniau in missionis internatzionalis) podint domandai de votai po currispondèntzia.
Is eletoris chi faint custu scèberu depint fai una domanda a posta chi bolit presentada a s’Ufìtziu eletorali de su Comunu innui sunt scritus a intru de su 24 de austu de su 2022.
Su mòdulu po presentai sa domanda fait a ndi ddu scarrigai de su giassu istitutzionali de is Comunus o de su giassu internet de su Ministeru de s’Internu.
Sa domanda, cumpilada totu comenti si spetat, firmada e paris a sa còpia de unu documentu de identidadi, chi non siat scadiu, nci bolit mandada a s’indiritzu de posta eletrònica tzertificada o a s’indiritzu de posta eletrònica ordinària de su Comunu de riferimentu.
Po totu is àterus informus fait a intrai a su giassu istitutzionali de is Comunus o a tzerriai a s’Ufìtziu eletorali de su Comunu de riferimentu.