Regione Sardegna
A pustis de duus annus chi sa pandemia de sa Covid at firmau totu, custa coa de cida in Sant’‘Eru de Còngius si torrat a fai festa po sa Bisita.
Sa Bisita est una festa litùrgica de sa crèsia catòlica, contada sceti in su vangelu de Luca. In custa dii si bolit arregordai candu sa Biada Vìrgini Maria, a pustis de ai scìpiu ca fiat abetendi a Gesus po òpera de su Spìridu Santu, andat a abisitai a Sillibeta, sa sorresta, prìngia issa puru a ora de bècia, candu nci fiat giai scrètia.
In Sant’Eru de Còngius ocannu si torrat a fai, comenti si depit, sa festa religiosa e cussa tzivili puru gràtzias a su traballu e a sa bona voluntadi de su Comitau de Santu Nigola de Sant’Eru, a sa Pro Loco de Simaghis, a su Comitau de Sant’Atzei 1972 e cun s’agiudu de s’Amministratzioni comunali de Simaghis.
Sa festa tzivili cumentzat sàbudu 28 de maju a is 8 de merii in Sant’ Eru de Còngius. Su Comitau de Sant’Atzei 1972 at cuncordau unu merii in cumpangia de Ireneo Massidda cun ballus e sonus in pratza de crèsia. Su Comitau s’at a incurai finsas de bendi cosa a papai e a bufai.
Domìnigu 29 de maju a is 10.30 de mangianu si portat sa Santa in prufessoni, si fait sa missa manna in sa crèsia de Santu Nigola e si giait sa beneditzioni a totu is pipieddus presentis. A s’acabu de sa funtzioni religiosa nc’ant a essi sa bateria de is scuetus e su cumbidu a incuru de su comitau de Santu Nigola de Sant’‘Eru.
Domìnigu merii a is 8 totus a si spassiai cun is Drìnnidas paris a Alessandro Nonnis e Giansilvio Pinna. Sa Pro Loco chi at cuncordau custu merii de festa at a fai e a bendi a papai e a bufai