Regione Sardegna
Solidarietà e giustizia sociale est su nòmini de sa lista chi s’est presentada po is votatzionis comunalis de su 12 de làmpadas. In custus ùrtimus seti mesis su comunu est stètiu amministrau de unu cummissàriu regionali chi s’est incurau de sa gestioni ordinària sceti.
Su candidau a sìndigu est Pinuccio Chelo chi is zrofolliesus connoscint beni ca at giai amministrau sa bidda de su 2006 a su 2021. Paris a issu atrus 11 candidaus in totu: mascus e fèminas, impiegaus, pensionaus, lìberus professionistas e giòvanus laureaus de pagu tempus. Unus cantu de is candidaus tenint giai esperièntzia in ambitu amministrativu. Is candidaus ant a essi sa boxi de is paesanus issoru e bolint rapresentai is valoris chi cumpartzint cun su prus de issus: sa famìllia, sa dinnidadi de su traballu, sa solidariedadi, sa giustìtzia sotziali, su beni comunu.
In su programma s’agatant is bideas chi s’amministratzioni diat a bolli portai ainnantis in contu de polìticas sotzialis, òperas pùblicas, sport, cultura e istrutzioni pùblica sena de si scaresci cantu sunt de importu sa comunicatzioni e sa trasparèntzia po s’atividadi amministrativa.
Est unu programma chi bolit melliorai sèmpiri prus su chi at fatu s’amministratzioni bècia, chi tenit a coru is cunditzionis sotzialis e econòmicas de is famìllias. Est in famìllia difatis chi nascint e crescint is tzitadinus de oi, e cussus de su benidori, chi intrant a fai parti de sa comunidadi.
“Unu programma sèriu chi non bolit fait prumissas a fueddus ma bolit circai de essi diaderus de agiudu e a canta a is famìllias: su nùcleu prus de importu innui crescint is arraxinis de sa comunidadi.”
Po ligi su programma cumpletu de sa lista Solidarietà e giustizia sociale fait a intrai a innoi o a su giassu istitutzionali de su comunu de Zrofolliu innui s’agatat publicau.