Regione Sardegna
Poste italiane fait a sciri ca, me in sa provìntzia de Aristanis, is pensionis de su mesi de abrili s’ant a pagai giai de cenàbura su 26 de martzu a is chi tenint unu Libureddu de arrespàrmiu, unu Contu Banco Posta o una Postepay Evolution. Po is chi tenint una carta Postamat, Carta Libretto o Postepay fait a nd’arretirai su dinai de is 38 ATM Postmat postus a disponimentu in totu sa provìntzia, sena de depi andai a su sportellu.
Sendi chi s’emergèntzia sanitària est sighendi ancora, sa sienda arregordat ca est pretzisu a fai totu cun responsabilidadi e arrespetendi is inditus de is autoridadis. Po custu, is chi no podint fai de mancu de nd’arretetirai su dinai de sa pensioni in unu Ufìtziu Postali, s’ant a depi presentai a is sportellus arrespetendi su turnu insoru conforma a s’òrdini alfabèticu comenti est cuncordau me in custu calendàriu, chi at a podi finsas mudai cunforma a su nùmeru de is diis chi s’ufìtziu interessau est abertu.
Is sangunaus de sa A a sa B: cenàbura su 26 de martzu;
de sa C a sa D: sàbudu a mangianu de su 27 de martzu;
de sa E a sa K: lunis su 29 de martzu;
de sa L a sa O: martis su 30 de martzu;
de sa P a sa R: mèrcuris su 31 de martzu;
de sa S a sa Z: giòbia su 1° de abrili.
Po is ufìtzius postalis chi abertint 3 diis a sa cida sceti:
Is sangunaus de sa A a sa D: sa primu dii;
de sa E a sa O: sa de duus diis;
de sa P a sa Z sa de tres diis.
Poste Italiane arregordat ca is tzitadinus de 75 annus o prus chi tenint deretu a prestatzionis previdentzialis me in is ufìtzius postalis, chi normalmenti incassant su dinai in contanti e chi no ant delegau a àterus po s’arretiru de sa pensioni insoru, podint pediri, sena de pagai nudda in prus, de arriciri su dinai inderetura a domu, giadendi s’incàrrigu a is Carabineris de si ndi dd’arretirai.
Poste Italiane fait finsas a sciri ca me in 8 ufìtzius postalis de sa provìntzia de Aristanis, fait a prenotai cun WhatsApp donniunu su turnu cosa sua a su sportellu. A pediri su ticket eletrònicu in custa manera est fàtzili meda: bastat a ponni in memòria me in su telefoneddu su nùmeru 371 5003715 e a sighiri totu is inditus chi serbint po otenni sa prenotatzioni de su ticket. Po su chi pertocat is ufìtzius chi sunt abilitaus a sa prenotatzioni cun WhatsApp, fait torra finsas a prenotai de domu su turnu a su sportellu inderetura cun su smartphone e su tablet a mesu de s’app “Ufficio Postale” o cun su computer culleghendi.sì a su giassu www.poste.it , innui no ddoi at abisòngiu de s’arregistrai.
Po sciri cali sunt is ufìtzius abilitaus a prenotai su ticket de domu e po àterus informus, fait a castiai me in su giassu www.poste.it oghinou fait a tzerriai a su nùmeru birdi 800 00 33 22. (s.m.)