Regione Sardegna
Sa Pro Loco de Siapicia at apariciau sa primu editzioni de su cuncursu a prèmius “Sipicia in frori” po fait prus bella sa bidda cuncordendi cun is froris balconis, fentanas, verandas e giardinus chi s’incorant me in is bias e scalas de sa parti de foras de is domus.
Su cuncursu bolit essi una manera po mudai sa bidda e avalorai su patrimòniu cosa sua traballendi a manus de pari cun sa Pro Loco e una manera po sensibilizai a is generatzionis noas a s’arrespetu de s’ambienti. Sa punna est cussa de avalorai is architeturas tìpicas amostendi cantu de bellu ddoi est in Siapicia e de fai cresci me in is giòvanus su sensu tzìvicu.
Su cuncursu est abertu a totu is residentis e po si nci scriri non si pagat nudda. Sa spesa po is froris est a càrrigu de is chi pigant parti a su cuncursu e su dinai no at a essi torrau.
Su mòdulu de iscritzioni si ndi podit scarrigai de su giassu istitutzionali de su Comunu o si podit pediri a sa Pro loco mandendi una mail a s’indiritzu Questo indirizzo email è protetto dagli spambots. È necessario abilitare JavaScript per vederlo. o pregontendi.ddu in deretura a is sòtzius de sa Pro Loco.
Su mòdulu de iscritzioni cumpilau si nci podit imbucai in sa cascitedda de sa posta de s’ambulatòriu comunali, me in bia Marconi, o mandai a sa mail de sa Pro Loco inghitzendi de su 20 de martzu. Po si nci iscriri a su cuncursu ddoi at tempus finsas a su 2 de abrili a mesudii e no ant a balli is iscritzionis chi arribant a pustis de su tempus stabiliu. A donniunu chi si nci scriri at a essi giau unu cartellu cun d-unu nùmeru, custu cartellu si depit ponni me in su giassu chi at a essi cuncordau cun is froris. Sa primu dii de maju una giuria sceberada de sa Pro Loco at a girai a intru de sa bidda po castiai totu is giassus cuncordaus chi pigant parti a su cuncursu. Sa giuria at a tirai fotografias e at a premiai a is primu tres classificaus pighendi in cunsidèriu: sa calidadi de is froris e de is matigheddas chi ant sceberau, s’originalidadi, sa fantasia, sa bellesa de is cumpositzionis e s’armonia de is coloris.
No ant a essi pigadas in cunsidèriu is iscritzionis arribadas a pustis de su 2 de abrili e is allestimentus chi no sunt fatus cun froris friscus ma cun froris de àterus materialis (froris de paperi, de plàstica etc.). (a.f.)