'Sardegna Sicura’, est sa prataforma tecnològica po is bisitadoris chi arribant a s’ìsula e chi bolit impreada a marolla po s’arregistrai candu si benit a Sardìnnia. Custa App immoi est a disponimentu finsas po is sistemas IOs e Android me in is butegas virtualis po is dispositivus mòbilis. A sa prataforma, duncas, de pagu diis fait a nci intrai no cun s’app web de su sportellu online de sa Regioni ‘sus.regione.sardegna.it’ sceti, ma fait finsas a dd’impreai cun s’App aposta po telefoneddus e tablet.

De s’8 de martzu de su 2021, cunforma a s’ordinàntzia de su Presidenti de sa Regioni, Christian Solinas, cun sa punna de giai prus seguresa e parai fronti a sa spraxidura de sa Covid-19, a totu is bisitadoris chi bolint arribai in Sardìnnia in aparèchiu o in navi, ddis tocat a presentai a s’imbarcu s’arrecidura de cunfirma de comenti si sunt arregistraus in ‘Sardegna Sicura’

, paris cun sa carta de imbarcu e su documentu de identidadi chi siat bàlidu.

S’arregordat ca, a prus de s’arregistrai me in s’App, po benni in Sardìnnia tocat finsas a arrispetai assumancus una de is cunditzionis previdias in s’artìculu n.4 de s’ordinàntzia regionali, est a nai:

- decrarai de s’ai fatu su vacinu po sa Covid-19;

- decrarai de s’ai fatu su tamponi chi est arresurtau negativu, a intru de 48 oras in antis de partiri;

- fai su tamponi apena arribaus, o me in is giassus aposta chi s’agatant in su portu o in s’aereoportu, o a intru de 48 oras chi unu est arribau;

- o tocat a si ponni me in isulamentu fidutziàriu po 10 diis, cun su doveri de ddu nai a su mèigu de mexina generali, a su pediatra chi s’est sceberau oghinou, po is chi no sunt residentis me in Sardìnnia, a sa Sienda sanitària chi est cumpetenti po su territòriu, tzerriendi a su nùmeru birdi aposta. (s.m.)