Regione Sardegna
Su Presidenti de sa Regioni, Christian Solinas, custas diis passadas at firmau duas ordinàntzias de importu po parai fronti e no spraxi s’epidemia de sa Covid-19 in Sardìnnia. Totu is disponimentus nous de ambadus ordinàntzias ant a intrai in vigori de lunis 8 de martzu.
Aici comenti aiat giai tentu modu de nai su Presidenti, cumentzendi de custa cida e finsas a su 24 de martzu, ant a agatai aplicu is arrègulas noas po chini benit in Sardìnnia, po fai a mancu de spraxi is contàgius in s’ìsula chi est, immoi, s’ùnica regioni in totu Itàlia classificada comenti de zona a “arriscu bàsciu”.
A chini arribat, de mari o de àiri, s’at a pregontai de s’allistai in sa setzioni dedicada de su portali istitutzionali de sa Regioni o de s’App “Sardegna Sicura” chi est a disponimentu poi s telefoneddus. Candu si fait s’allistadura, chi bolit averiguada in su mometu de s’imbarcu, is biagiadoris ant a podi decrarai de ai fatu su vatzinu (est a nai de ai fatu ambadus dosis previdias) o de ai fatu su test cun tamponi antigènicu o moleculari chi at giau èsitu negativu “fatu - narat s’ordinàntzia- a intru de 48 oras de sa partèntzia”.
Is chi no ant fatu su vatzinu e nimancu su test in antis de arribai in Sardìnnia, depint fai una de custas tres cosas po essi in règula cun su chi previdit s’ordinàntzia: fai su tamponi antigènicu apena chi arribant, in unu de is giassus chi ant a agatai in is portus o aeroportus, e tenint s’òbrigu, si s’arresurtau est negativu, de torrai a fai su test a pustis de 5 diis; fai su tamponi moleculari in una strutura autorizada (pùblica o privada chi siat) a intru de 48 oras de candu sunt lòmpius in Sardìnnia; abarrai in isulamentu in su domitzìliu cosa insoru po 10 diis, informendi su dotori de famìllia, su pediatra o, po is chi non sunt residentis me in Sardìnnia, s’Azienda sanitària de cumpetèntzia territoriali tzerriendi a su nùmeru birdi.
S’àtera ordinàntzia, chi at a balli finsas a su 15 de martzu, francu perlongamentus chi s’ant a podi fai cunforme a comenti mudat s’epidemia, disponit su tanti de genti chi podit pigai in is mezus de trasportu pùblicu locali chi, francu su trasportu scolàsticu a posta, no at a essi prus de su 50% de is postus disponìbilis in totu. Su Presidenti in prus at stabiliu is modalidadis de sa didàtica po is scolas segundàrias de segundu gradu a manera chi “assumancus a su 50% de is studiantis, e finsas a unu màssimu de su 75%, - aici est scriitu in s’ordinàntzia- siat assegurada sa didàtica in presèntzia, e a dònnia modu sena de propassai sa percentuali chi s’est sighia finsas a immoi”. Si podit fai didàtica in presèntzia po su chi pertocat is fainas e laboratòriu e candu “tocat a assegurai una educatzioni- si ligit- po s’inclusioni scolàstica de is alunnus cun disabilidadi e BES”, cunforma a cantu previdint is dispositzionis natzionalis. Sighit a essi totu in presèntzia s’atividadi didàtica in is servìtzius educativus po sa pipiesa, sa scola de sa pipiesa e su primu tziclu de s’ istrutzioni; poi s Universidadis invècias est previdiu, e aici etotu po is istitutzionis de formatzioni arta artìstica, musicali e corèutica, de cuncordai atividadis in presèntzia e a distàntzia cunforma a comenti mudat sa pandemia.
“Sa Sardìnnia, sa primu e immoi ùnica regioni a essi classificada in zona bianca- at nau su presidenti Solinas- tenit su deretu de torrai a sa normalidadi a bellu a bellu po amparai s’arresurtau tentu fendi sacrifìtzius mannus meda. Su virus est ancora girendi e depeus sighiri totu is arrègulas e precautzionis chi scideus po ndi bessiri de custa emergèntzia su prus impressi chi fait. S’impinniu nostu contra de sa Covid sighit sena de pàsiu, po is sardus, po is studiantis de totu su territòriu nostu e po totu is chi ant a torrai in Sardìnnia e chi dd’ant a podi fai in seguresa”. (a.f.)
Innoi a suta fait a ligi is ordinàntzias de su Presidenti de sa Regioni:
Ordinàntzia n.5 de su Presidenti de sa Regioni de su 5 de martzu de su 2021
Ordinàntzia n.6 de su Presidenti de sa Regioni de su 5 de martzu de su 2021