Regione Sardegna
“In su 2019, sa Sardìnnia, gràtzias a s’impìnniu de totu is comunidadis de s’ìsula nosta, at fatu unu sàrtidu ananti de su 6,3% (fiat a su 67% e est lòmpia a su 73.3%) in sa percentuali de arregorta sceberada, ponende.si segunda in sa graduatòria natzionali po sa cantidadi de àliga arregorta e de torrai a impreai”. Custus fueddus at nau s’assessori regionali de sa defensa de s’ambienti, Gianni Lampis, su 24 de friàrgiu in sa de tres editzionis de s’Ecoforum Sardìnnia chi at apariciau Legambienti in videucunferèntzia.
“Est stètiu unu traballu mannu de scuadra intra de sa Regioni, is entis localis e is tzitadinus chi s’at fatu lompi a custu arresurtau, chi gei no est de seguru unu puntu de arribu ma s’in casu unu bellu puntu de innui cumentzai po lompi, a intru de su 2022, a sa percentuali de s’80% in s’arregorta sceberada “- at aciuntu s’assessori Lampis - “Custa est sa punna e finsas sa sfida culturali de fundamentu chi teneus su doveri de binci, a manus de pari cun is giòvanus nostus”.
“Un’arresurtau chi seus arribaus a tenni finsas gràtzias a sa lungimiràntzia polìtica chi at investiu in s’impiantìstica pùblica: pagu tempus a immoi aus aprovau prus de 20 millionis de èurus po mellorai is profetus de is impiantus po s’àliga chi fiant, su prus, me in is Cunsòrtzius industrialis. Ma is sfidas de importu sunt àteras puru: a fai un’ecotzentru me in dònnia comunu de Sardìnnia, cosa chi seus acabendi de fai, a mellorai is struturas chi esistint giai, po chi nci siat prus logu a disponimentu po sceberai mellus. Ponendi in contu ca in s’istadi sa cantidadi de àliga chi si produsit crescit meda, sa bidea est cussa de ponni struturas mòbilis in logus de costera e de mari po fai a manera chi sa cantidadi de àliga sceberada abarrit sèmpiri manna; amus pensau finsas a unu tanti de pagai “chini prus imbrutat prus pagat” a tenori de sa cantidadi de àliga chi si fait”. S’assessori de sa Giunta Solinas at acabau narendi aici s’interbentu cosa sua a s’Ecoforum Sardìnnia. (a.f.)