Regione Sardegna
In un’atòbiu fatu me in Biddaspitziosa su 18 de gennàrgiu de su 2021, s’assessora a is afàrius generalis Valeria Satta, chistionendi de is traballus po cumpletai is infrastuturas telemàticas de sa bidda, at nau finsas ca sa punna est cussa de favoressi sa possibilidadi de connessioni digitali po totu is Comunus sardus, a manera de giai servìtzius tecnològicus de cabali.
At nau finsas ca, imoi chi fait torra a fai atòbius me in su terrìtoriu, sighit finsas su programma po megiorai e afortiai is infrastruturas de sa Sardìnnia. Impari cun is amministradoris localis, tocat a sceberai is fainas de fai in is mesis chi ant a sighiri, a manera de favoressi sa digitalizatzioni in totu sa regioni, finsas in is logus prus spèrdius.
Po custus logus est de importu mannu s’interbentu de sa Regioni, poita ca meda bortas is operadoris privaus si ndi scarescint de issus e abarrant a segus de is àterus po su chi pertocat sa possibilidadi de impreai sa arretza internet e de tenni profetu de sèrvitzius tecnològicus de cabali.
S’Assessorau est cuncordendi unas cantu fainas de importu mannu, in contu de sa arretza telemàtica, cun sa punna de favoressi sa possibilidadi de traballai impari cun is amministradoris localis, a manera chi, sendi totus cullegaus a pari, si potzant giai servìtzius a is tzitadinus cun una arretza prus lestra e fidada.
Àterus atòbius s’ant a fai su 25 de gennàrgiu me in Illorai e su 27 de gennàrgiu de su 2021 me in Crabonàxia.