Regione Sardegna
S’Assessorau regionali a sa sanidadi at publicau su bandu “Sine Limes” po giai contributus econòmicus in “bonus de servìtziu” po agiudai a is personas chi tenint pagu autonomia. Sa punna de s’abisu est cussa de finantziai servìtzius chi potzant essi de agiudu a is personas dèbilis e fràgilis chi, po mori de s’emergèntzia de sa Covid, ant bistu impiorai is cunditzionis insoru.
Is bonus sunt agiudus in dinai po favoressi s’atzessu a s’ arretza de is servìtzius sòtziu-sanitàrius, sanitàrius, servìtzius de cura e de assistèntzia in domu.
Chini podit fai domanda:
- is chi sufrint de una disabilidadi cunforma a s’art. 3 de sa Lei 104/92;
- is chi sunt in càrrigu a is tzentrus de saludi mentali o a s’Unidadi Operativa de Neuropsichiatria de s’Infàntzia o de s’Adolescèntzia (UONPIA);
- is chi sunt intraus in edadi e chi tenint assumancus 85 annus.
Is bonus de servìtziu sunt contributus a “fondo perduto”, po torrai su tanti de dinai spèndiu po pagai unu servìtziu. Po essi amìtius a su benefìtziu, s’aprontat una graduatòria de totus is chi tenint deretu, e cunforma a su tanti de dinai a disponimentu, intrant in antis is primus chi ant presentau sa domanda.
Is domandas po podi tenni su contributu bolint fatas sceti cumpilendi sa Domanda telemàtica (DT) chi sa Regioni at a ponni a disponimentu in su sistema de informu de traballu e formatzioni professionali (SIL) a s’indiritzu www.sardegnalavoro.it.
Sa Domanda telemàtica, impari cun is allegaus e in sa versioni definitiva sua, fait a dda presentai cumentzendi de is 09.00 de su 29 de gennàrgiu de su 2021.
De is 09.00 de su 25 de gennàrgiu 2021 e finsas a is 08.59 de su 29 de gennàrgiu fait a cumpilai sa domanda in deretura a intru de su sistema SIL, in “modalidadi botza”, e si podit mudai finsas a candu no lompit su tempus de nci dda mandai.
Totu is informus chi pertocant s’avisu bolint pregontaus a su Servìtziu de is polìticas po sa famìllia e s’inclusioni sotziali de sa Diretzioni generali de is polìticas sotzialis a s’indiritzu Questo indirizzo email è protetto dagli spambots. È necessario abilitare JavaScript per vederlo.
Po totu is detàllius e rechisidus ligi s’Avisu cumpletu SINE LIMES e totu is documentus acapiaus chi s’agatant publicaus me in su giassu istitutzionali de sa Regioni Sardìnnia. (a.f.)