Regione Sardegna
Su 12 de gennàrgiu me in Casteddu, s’Assessora regionali a s’agricultura Gabriella Murgia, po arrespundi a is chistionis chi dd’ant fatu is assòtzius de categoria e àterus polìticus, at nau ca ocannu passau sa Regioni est abarrada acanta de is messajus chi ant tentu dannus no solu po mori de is cunseguèntzias de s’epidemia de sa COVID-19, ma finsas po su tempus malu chi at fatu dannus mannus in is biddas e in su sartu. At decrarau ca imoi puru sa Regioni est pronta a giai una manu de agiudu a is siendas chi ant tentu dannus po mori de s’àcua meda, ponendi-ddis a disponimentu arresursas cuncretas.
S’Assessora at arregordau is dannus mannus chi, prus de totus is àteras, at tentu sa bidda de Bitzi cun mortus e ferius puru, su 28 de donniasantu de ocannu passau. Su tempus malu at tocau a manera grai finsas sa baddi de su Cedrinu e sa zona de Aristanis. Ma custa situatzioni at giau cropus malus a totu s’agricultura de s’ìsula, cun meda dannus a is struturas e a sa produtzioni agrìcula.
Po custu sa Giunta Regionali aiat stabiliu de interbenni luegus decrarendi su stadu de emergèntzia regionali e giadendi s’incàrrigu a s’Amparu Tzivili e a s’Assessorau a s’agricultura de fai su contu de is dannus e de cuncordai is interbentus prus de apretu.
Po parai fronti a s’abbisòngiu de agiudu, sa Lei regionali n.30 de su 15 de nadali de su 2020 po imoi at postu a disponimentu de s’agentzia Laore 10 milionis de èurus. S’agentzia est incarrigada de fai su contu de is dannus chi ant tentu is siendas agrìculas. In custas diis s’at a depi sciri su chi nd’est bessiu a pillu de is traballus chi at fatus finsas cun s’agiudu de s’Amparu Tzivili.
Custu dinai chi sa Lei n.30 at postu a disponimentu, no at a bastai a pagai totu is dannus tentus de is siendas sardas, duncas at a tocai a ndi ponni àteru candu s’at a fai sa Lei de stabilidadi po su 2021. Po agatai custu dinai tocat a ponni in contu ca si seus movendi in unu cuntestu comunitàriu, natzionali e regionali chi no si bolit prus frimai a is agiudus de tipu cumpensativu a pustis de su dannu, chi solu in parti arrennescint a assentai is cosas, ma chi bolit, a s’imbressi, promovi fainas de assicuratzioni po is arriscus chi ddoi sunt me in s’agricultura.
S’Assessorau a s’agricultura, chi giai ponit su dinai de su bilàntziu regionali po custas assicuratzionis, tenit finsas idea de fai nasci unu fundu po agiudai is siendas chi depint ponni in antis su dinai de sa pòlitza de s’assicuratzioni. A dònnia manera, a dii de oi, ddoi sunt unus cantus impedditzus chi faint stentai s’ativatzioni de custu fundu.
In is diis a pustis de su 28 de donnasantu de su 2020, finsas àterus logus ant tentu dannus po su tempus malu, e in mesu de custus ddoi est sa zona de Aristanis puru. Po custu s’est torrau a giai s’incàrrigu a s’agentzia Laore po torrai a fai su contu de is dannus, comenti at a acabai de proi diaici meda, a manera chi fetzat a fai totu is averiguaduras in cunditzioni de seguresa. Po custus ùrtimus dannus s’at a arrespundi luegus giadendi su dinai chi, po imoi, est a disponimentu, e a pustis s’at a integrai su fabisòngiu cun sa Lei de stabilidadi de su 2021 chi sa Giunta est fendi. (s.m.)
Craca a innoi po ndi sciri de prus.