Regione Sardegna
Unu de is problemas prus mannus de sa sotziedadi moderna de is tempus nostus est cussu de is antzianus chi bivint solus e chi sufrint a sa muda, in domu issoru, sena chi si ndi acatit nemus.
Po custu, su Comunu de Siapicia at pensau de cuncordai su progetu “adotta un nonno per natale….e oltre”.
Sa punna de su progetu est cussa de agiudai a is àterus, de fai cumpangia a unu bèciu de Siapicia chi bivit solu solu in domu sua o chi s'agatat ricoverau in sa Comunidadi integrada.
Totu is famìllias chi bolint fai cust’esperièntzia bella si podint scriri comenti “famìllias adotivas” po su tempus de is festas de Paschighedda e po a pustis puru…..si bolint!
Is famìllias e is personis chi ant a giai sa disponibilidadi issoru, ant a depi aprontai una scàtula cun aintru unu arregaleddu (unu billeteddu, unu disènniu de unu pipiu, una fotografia, durcis, unu libru, unu cruciverba o una cositedda fata a manus) de giai a unu de is antzianus de sa bidda po ddu fai a intendi prus apretziau e prus pagu solu. At a fai finsas a ddu telefonai o a ddi mandai unu messàgiu po ddi fai is augùrius de Paschighedda.
Chini si bolit proponni che a famìllia adotiva depit compilai su mòdulu chi s’agatat in sa scola o in Comunu e, a intru de su 18 de nadali, nci depit portai a Comunu s’arregaleddu chi at cuncordau.
Sa dii de su bèsperu, o sa dii de Paschighedda, podit fai una telefonada po fueddai cun s’antzianu e po ddi fai is aùgurius.
Su Comunu torrat gràtzias a totu is chi ant a pigai parti a custu progetu.
In su giassu istitutzionali de su Comunu de Siapicia fait a ligi sa nova e su manifesteddu.