Regione Sardegna
Comenti stabiliu in su calendàriu scolàsticu regionali, su 14 de cabudanni de su 2022 sunt torradas a cumintzai is atividadis didàticas me in is scolas de s’Ititutu Cumprensivu Statali de Simaghis-Biddobrana.
Su Dirigenti scolàsticu, Giuseppe Scarpa, is insenniantis e totu su personali de sa scola ant bòfiu fai is augùrius prus bellus a totu is studiantis e a is famìllias issoru.
“ A is dischentis nostus boleus fai is mellus augùrius po chi sa scola siat una ghia chi ddus agiudit a cresci. Su traballu nostu no at a essi sceti su de ddus fai studiai ma su de ddis giai un’aprigu siguru po agatai su caminu issoru, po fai esperièntzias noas, po si cunfrontai pari pari e cumpartziri cun is maistus e is cumpàngius de classi su prexu de fai paris un’àteru tretu de caminu”. “PARIS at a essi su fueddu chi nos at a rapresentai. Amus a traballai PARIS comenti de una scuadra manna in su bellu e in su malu, PARIS a is famìllias, PARIS po agiudai a totus sena de lassai a nemus agoa”.
Aici at scritu su Dirigenti de s’Istitutu in sa lìtera cuncordada po saludai a totu sa comunidadi scolàstica e at aciuntu a s’acabbu:
“A totu is comunidadis nostas is augùrius prus bellus poita no amanchit mai s’impìnniu de donniunu po fraigai su benidori, tenendi sèmpiri a menti e a coru is valoris identitàrius, culturalis e sotzialis; cunfrontendi.sì e agiudendi.sì pari pari sena lassai nemus solu a un’ala. Is pipius e is pipias, is piciocheddus e is piciocheddas sunt su benidori nostu e a issus TOTU PARIS amus a donai totu is energias nostas. Bonu annu scolàsticu a totus!”
Su calendàriu de is oràrius de sa primu cida de scola, de mèrcuris 14 a sàbudu 17, fait a ddu castiai in su giassu istitutzionali de s’Istitutu https://icsimaxis-villaurbana.edu.it/ e in is giassus istitutzionalis de is Comunus de s'Unioni.