Regione Sardegna
Cunformas a cantu stabiliu in su calendàriu scolàsticu regionali su 14 de cabudanni totu is studiantis sardus ant a torrai a scola, a chini at a intrai po sa primu borta e a chini po s’ùrtimu annu. In giassus meda de Sardìnnia is scolas ant torrau a aberri giai de oi, 12 de cabudanni.
Su Presidenti de sa Regioni Solinas at bòfiu fai a is piciocus e a is piciocheddas sardas is augùrius po custu cumentzu de annu scolàsticu. “In d-unu mundu chi est sèmpiri cambiendi, cun tecnologias sèmpiri prus noas e modernas, su stùdiu est sa mellus aina po parai fronti a is sfidas de su benidori. Sa Sardìnnia, a dii de oi prus de sèmpiri, tenit abisòngiu de s’entusiamu chi teneis bosàterus e de sa gana de scoberri, connosci e imparai cosa a nou”. At nau aici su presidenti e at aciuntu “si nci arrennesceus a fraigai unu benidori prus bellu at a essi gràtzias a bosàterus puru. Bonu printzìpiu de annu scolàsticu a totu is studiantis sardus”
Duus fueddus su Presidenti ddus at naus a is mastrus puru “S’ insenniamentu est unu traballu chi cumportat sacrifìtziu e amori po sa professioni. A is mastrus e a totu su personali de sa scola, chi paris a is genitoris depint fai unu traballu mannu, is augùrius sintzerus e afetuosus de bonu traballu!”.
Sa spera est chi paris a is augùrius bellus de su Presidenti sa Regioni nosta siat prus atenta, prus pronta a parai fronti a is dificultadis chi s’ant a presentai, prus disponìbili a cundordai progetus e a promovi ainas po melliorai is scolas e fai cresci is giòvanus nostus.
Po cantu pertocat unus cantu studiantis residentis in is Comunus de S’Unioni sa scola est giai cumentzada….
Po is pipius de s’asilu, de sa scola elementari e de sa scola mèdia de Àllai (chi fait parti de s’Istitutu Cumprensivu de Samugheo) sa scola est torrada a cumentzai custu mangianu in is localis de Samugheo. Su calendàriu de s’oràriu provisòriu de is letzionis po sa primu cida de scola est publicau in su giassu istitutzionali de s’Istitutu: http://comprensivosamugheo.edu.it/
In is biddas de s’Istitutu Cumprensivu de Simaxis-Biddobrana (Biddobrana, Ollasta, Siamanna, Siapicia, Simaghis, Solarussa e Zrofolliu) is scolas ant a cumentzai su 14 de cabudanni. S’oràriu provisòriu de sa primu cida de letzioni fait a ddu ligi in su giassu istitutzionali de s’Istitutu https://icsimaxis-villaurbana.edu.it/index.php
Tra su 12 e su 14 de cabudanni ant a torrai a scola finsas totu is studiantis de sa provìntzia chi frecuentant is scolas mannas in sa tzitadi de Aristanis.