Regione Sardegna
Sunt medas is biddas sardas chi afestant a Nostra Sennora de s’Arremèdiu. In Aristanis nc’est unu de is santuàrius prus mannus de Sardìnnia intitulau a issa. Innia ocannu sa festa at a essi prus manna de sèmpiri po arregordai is 70 annus de s’incoronatzioni de Nostra Sennora.
Is Siapiciesus puru sunt devotus meda a Nostra Sennora de s’Arremèdiu: dd’invocant in s’ora mala, ddi torrant gràtzias e dd’afestant dònnia annu in su mesi de cabudanni in sa cresiedda a issa intitulada.
Su 29 de austu sunt cumentzadas is novenas chi ant a sighiri fintzas a su 9 de cabudanni cun s’arrosàriu e sa missa dònnia dii a merii. De su 7 a su 10 de cabudanni cumentzat sa festa religiosa e cussa tzivili chi ocannu ant cuncordau is fedalis de sa Leva de su ’72.
Su 7 de cabudanni, sa dii de su bèsperu, a is 17.00 de meri su Sìndigu at a giai is pandelas e nc’at a essi a pustis sa cursa de is tres pandelas. A is 19.00 de merii s’at a fai sa missa e sa fiacolada acumpangiada de is sonus de sa fisarmònica e de is launeddas e de totu sa genti chi at a bolli torrai gràtzias a Nostra Sennora ponendi.sì su costumu sardu puru.
Su 8 de cabudanni a is 10.00 de mangianu at a cumentzai sa prufessoni cun sa Santa chi at a passai peri is bias de sa bidda acumpangiada de is cunfrarias de Siapicia, Siamanna e Biddobrana, de is cavalleris e de is sonadoris de fisarmònica e launeddas e de sa genti bestia in costumu sardu, a s’acabbu nc’at a essi sa missa manna.
Su 9 de cabudanni a is 19.30 de merii su predi at a nai sa missa e at a beneixi is arrosas.
Acapiada a sa festa religiosa nc’est sa festa tzivili puru:
su 7 de cabudanni: gara de poesia cun Saverio Sodde de Irbono e Giovanni Carta de Ardaule acumpangiaus de is tenoris de Sòrgono;
su 8 de cabudanni a merii: giogus po pipius, e a su noti ballus sardus cun is grupus folk de Busache, Villasor e Sèdilo. A mesunoti s’arroda e a pustis si sighit a fai festa cun su DJ Jerry.
su 9 de cabudanni: ballus sardus in pratza e a pustis su grupu Inkoma Vasco Rossi tribut band
su 10 de cabudanni: mùsica cun DJ e spetàculu
Is fedalis de su 1972, chi ant cuncordau su comitau e sa festa de Nostra Sennora de s’Arremèdiu, torrant gràtzias a s’Amministratzioni comunali de Siapicia, a su predi, a sa Pro Loco, a is siapiciesus e siamannesus, a is sponsor e a chini totu at giau una manu de agiudu po sa bona arrennèscida de sa festa e giaint apuntamentu a ocannu chi benit augurendi a totus a Atrus annus mellus! e chi …..Deus bollat!