Si fait a sciri a is interessaus ca fait a fai domanda po arriciri is bonus po is fainas de s’istadi cuncordadas po pipius e piciocheddus de is 3 a is 17 annus.

Su bonu de servìtziu est unu agiudu econòmicu de unu tanti de dinari chi si giait po parai fronti a is spesas chi is famìllias de is pipius faint po gosai de unu servìtziu estivu, sa spesa po sa scritzioni e po fai is fainas de su servìtziu, cuncordau de is ditas chi si sunt acreditadas in s’Unioni de is Comunus de sa Baddi Bàscia de su Tirsu e de su Grìghini.

Su bonu dd’at a giai su comunu, chi at a torrai parti de sa spesa fata, a pustis chi si presentat sa fatura o ritzevuta, fata de su fornidori, chi atestat ca su pipiu at pigau parti a su servìtziu. Fait a giai un’acontu, totu paris o solu unu tanti de dinari, sceti in situatzionis particularis de apretu sotziali e econòmicu e, a dònnia modu, in tzircustàntzias aici at a essi s’Ufìtziu de is Servìtzius Sotzialis a biri su de fai. Is bonus sunt personalis, no fait a fai a càmbiu a pari e mancu a ddus giai a àtere.

Su tanti màsimu chi fait a giai est 300 èurus, in situatzionis particularis sceti, chi at a stabilessi su Servìtziu sotziali, pighendi in cunsideru sa situatzioni econòmica ecuivalenti de chini at fatu domanda cunformas a sa tzertificatzioni ISEE 2022 cosa sua.

Is interessaus podint fai domanda po arriciri su Bonus Servìtziu a s’Ufìtziu de is Servìtzius Sotzialis de su Comunu de Zrofolliu, cumentzendi de su 12 de trìulas finsas a su 25 de trìulas 2022. Sa domanda cheret presentada in su mòdulu chi at aprontau a posta s’Ufìtziu de su Servìtziu Sotziali de su Comunu. Tocat a presentai una domanda po dònnia fìllu.

S’avisu pùblicu in italianu, su mòdulu de domanda e su catàlogu de is propostas progetualis s’agatant publicaus e fait a ndi ddus scarrigai de su giassu istitutzionali de su Comunu de Zrofolliu