Custas diis passadas sa Sardìnnia at pigau parti in Parigi a su Saloni mundiali de su turismu, presentendi su programma cosa sua “Insula - Sardinia quality world - Alla scoperta di un mondo chiamato Sardegna”, unu programma de marketing territoriali promòviu de s’Assessorau a su Turismu e de su Cipnes (cunsòrtziu industriali provintziali de su nord-est Sardìnnia).

 “Po promovi su turismu in Sardìnnia sunt de importu mannu percursus de identidadi e de esperièntzias acapiaus a unu modellu de turismu sustenìbili” - at nau s’Assessori regionali Chessa, e at aciuntu: “S’ìsula nosta gràtzias a sa stòria, a is traditzionis, a sa cultura, a s’arrichesa de s’enogastronomia cosa sua, podit giai produtos de calidadi e, aciungendi custu a is atras formas de turismu chi giai nci sunt, podeus arrennesci a tenni genti in Sardìnnia in totu is tempus de s’annu e no in su stadiali sceti.”

“Su turismu chi castiat a is logus e a is esperièntzias est sèmpiri crescendi e sa Sardìnnia ndi depit aprofitai promovendi s’unicidadi sua, sa longària e sa calidadi de sa fida, sa biodiversidadi sunt cosas de fai a connosci in dònnia logu de su mundu” at nau su Presidenti de sa Giunta Solinas.